मनकामना इन्जिनियरिङ्ग हाइड्रोपावर लिमिटेडले पहिलो चरणमा असार १९ देखि आईपीओ निष्कासन गर्ने भएको छ ।

पहिलो चरणमा कम्पनीले आयोजना प्रभावित क्षेत्रका स्थानीय बासिन्दा तथा वैदेशिक रोजगारीमा रहेका नेपालीहरूका लागि आईपीओ निष्कासन गर्न लागेको हो । कम्पनीले आयोजना प्रभावित क्षेत्रका स्थानीय बासिन्दाहरूका लागि ८ लाख कित्ता  र देशिक रोजगारीमा रहेका नेपालीमा २ लाख कित्ता आईपीओ विक्री गर्न लागेको हो।

स्थानीयको लागि निस्कासन गरिएको शेयरमा  दोलखा जिल्लाको गौरीशंकर गाउँपालिका वडा नं. ५, ६, ७ र ८, बिगु गाउँपालिका वडा नं. ४ र कालिञ्चोक गाउँपालिका वडा नं. ३ का बासिन्दाहरूले आवेदन दिन सक्नेछन् । यो आईपियोमा न्यूनतम १० कित्ताका लागि आवेदन दिनु पर्ने छ भने स्थानीयहरूले अधिकतम १ लाख  र वैदेशिक रोजगारीमा रहेका नेपालीहरूले अधिकतम ५० हजार कित्तासम्म आवेदन दिन पाउने छन्।

कम्पनीको आईपीओ निष्कासन तथा विक्री प्रबन्धकमा बिओके क्यापिटल मार्केट लिमिटेड छ । स्थानीय बासिन्दाले विक्री प्रबन्धकसँगै कम्पनीको रजिष्ट्रर्ड कार्यालय, प्रभु बैंक, सिन्धु विकास बैंक र नेपाल इन्भेष्टमेन्ट मेगा बैंकका तोकिएका शाखा कार्यालय तथा गौरीसंकर गाउँपालिकाको कार्यालयबाट आवेदन दिन सक्नेछन् ।

यो आईपीओ  साउन २ गतेसम्म विक्रीमा रहनेछ तर सो अवधिसम्म माग बमोजिम आवेदन नपरेमा आयोजना प्रभावित स्थानीयका लागि भने ढिलोमा साउन १७ गतेसम्म विक्री खुला हुनेछ ।

आईपीओ निष्कासनको लागि गराएको रेटिङ्गमा केयर रटिङ्ग नेपालले कम्पनीलाई दायित्व वहन गर्ने क्षमतामा औसत जोखिम रहेको संकेत गर्ने केयर एनपी डबल बी इस्यूअर रेटिङ्ग प्रदान गरेको छ । यस कम्पनीले दोलखामा ५ मेगावाट क्षमताको घट्टेखोला जलविद्युत आयोजना निर्माण सम्पन्न गरिसकेको छ ।