शेयर बजारसम्बन्धी जानकारी, समाचार र लगानी शिक्षाका सामग्री प्रकाशन गर्दै आएको नेप्से बजारले सञ्चालन गरेको ‘लगानी शिक्षा’ प्लेटफर्ममा शेयर बजारका विषय अध्यायगत रूपमा पढ्न मिल्ने डिजिटल लाइब्रेरी सुविधा उपलब्ध गराएको छ।

डिजिटल लाइब्रेरीमार्फत प्रयोगकर्ताले शेयर बजारसँग सम्बन्धित विभिन्न विषय मोबाइल, ल्यापटप वा कम्प्युटरबाट अनलाइनमै पुस्तकको स्वरूपमा पढ्न सक्नेछन्। एउटै विषयलाई छोटा अध्यायमा विभाजन गरेर राखिएकाले आफूलाई आवश्यक विषय छानेर क्रमशः अध्ययन गर्न सकिने व्यवस्था गरिएको छ।

लाइब्रेरीमा शेयर बजारका आधारभूत विषयदेखि टेक्निकल तथा फन्डामेन्टल एनालाइसिससम्मका सामग्री समेटिँदै गएका छन्। क्यान्डलस्टिक, ट्रेन्ड, सपोर्ट–रेजिस्टेन्स, चार्ट प्याटर्न, मुभिङ एभरेज, स्टप लस, रिस्क म्यानेजमेन्टजस्ता टेक्निकल विषयसँगै EPS, P/E, नेटवर्थ, ब्यालेन्स सिट, नाफा, ऋण तथा कम्पनीको वित्तीय अवस्था बुझ्ने विषय पनि अध्ययन गर्न सकिने गरी सामग्री तयार गरिएको छ।
लगानी शिक्षामा जानको लागि यहाँ क्लिक गर्नुहोस्

विशेषगरी मोबाइल प्रयोगकर्तालाई ध्यानमा राखेर सामग्रीलाई लामो PDF वा परम्परागत ई–बुकमा सीमित नराखी अनलाइनमै अध्यायअनुसार पढ्न मिल्ने स्वरूपमा राखिएको छ। यसले कुनै विषयबारे जान्नुपर्ने बेला पूरै पुस्तक खोज्नुभन्दा सम्बन्धित अध्यायमा गएर सीधै अध्ययन गर्न सजिलो बनाउने अपेक्षा गरिएको छ।

‘लगानी शिक्षा’ प्लेटफर्ममा डिजिटल लाइब्रेरीसँगै ई–बुक, भिडियो सामग्री, क्विज, TMS Simulator, Portfolio Manager लगायतका सुविधा पनि उपलब्ध छन्। यसरी पढेको विषयलाई अन्य अभ्यासमूलक सुविधामार्फत थप बुझ्न सकिने गरी प्लेटफर्म विस्तार गरिएको छ।

शेयर बजारमा प्रवेश गर्न TMS चलाउन जान्नु मात्रै पर्याप्त नहुने र कम्पनी, मूल्य, जोखिम तथा चार्टको आधारभूत ज्ञान पनि आवश्यक पर्ने भएकाले अध्ययन सामग्रीलाई सरल नेपाली भाषामा तयार गरिएको नेप्से बजारले जनाएको छ। डिजिटल लाइब्रेरीमा नयाँ विषय र पुस्तक क्रमशः थपिँदै जानेछन्। प्रयोगकर्ताले आफ्नो समयअनुसार मोबाइलबाटै अध्ययन गर्न सक्ने भएकाले शेयर बजारसम्बन्धी व्यवस्थित सामग्री खोजिरहेका व्यक्तिका लागि यो सुविधा उपयोगी हुन सक्ने देखिन्छ।