अपि पावर कम्पनीले हकप्रद शेयर निष्कासन गर्ने भएको छ।

कम्पनीले हाल कायम चुक्ता पूँजीको ४० प्रतिशत अर्थात १ बराबर शून्य दशमलव ४० अनुपात हकप्रद शेयर निष्कासन  गर्नका लागि नियामक निकाय नेपाल धितोपत्र बोर्ड (सेबोन) मा निवेदन दिएको छ । उक्त कार्यको लागि कम्पनीले चैत ६ गते सेबोनमा निवेदन दिएको हो ।

कम्पनीले सेबोनबाट स्वीकृति पाएपछि रू. १ सय अंकित दरका १ करोड ६५ लाख ३३ हजार १३७ कित्ता हकप्रद शेयर निष्कासन गर्नेछ ।  ७ दशमलव ५ प्रतिशत बोनस शेयर वितरण पछि कम्पनीको चुक्ता पूँजी रू. ४ अर्ब १३ करोड पुग्नेछ । उक्त हकप्रद शेयर निष्कासनको लागि  विक्री प्रबन्धकको काम  मुक्तिनाथ क्यापिटल लिमिटेडले गर्ने छ।

हकप्रद शेयर निष्कासन बाँडफाँट पश्चात कम्पनीको चुक्ता पूँजी रू. ५ अर्ब ७८ करोड भन्दा बढी पुग्नेछ । कम्पनीले निर्माणाधीन ४० मेगावाट क्षमताको माथिल्लो चमेलिया जलविद्युत आयोजनाका लागि थप पूँजी जुटाउन हकप्रद शेयर निष्कासन गर्न लागेको हो ।