नेपाली शेयर बजारसम्बन्धी सूचना, समाचार तथा लगानी शिक्षाका सामग्री प्रकाशन गर्दै आएको नेप्से बजारले शेयर बजार सिक्न चाहनेहरूका लागि ‘लगानी शिक्षा’ नामक अनलाइन सिकाइ प्लेटफर्म सञ्चालनमा ल्याएको छ। यसमार्फत घरमै बसेर शेयर बजारका आधारभूत विषयदेखि प्राविधिक तथा आधारभूत विश्लेषणसम्म अध्ययन गर्न, अभ्यास गर्न र आफ्नै लगानी रणनीति परीक्षण गर्न सकिने व्यवस्था गरिएको छ।

‘लगानी शिक्षा’लाई सामान्य ई–बुक वा अनलाइन पाठ्यक्रममा मात्र सीमित नराखी पढ्ने, हेर्ने, अभ्यास गर्ने, विश्लेषण गर्ने र आफ्नो ज्ञान परीक्षण गर्ने एउटै डिजिटल प्लेटफर्मका रूपमा विकास गरिएको छ। प्लेटफर्ममा डिजिटल पुस्तक, ई–बुक, भिडियो पाठ्यक्रम, क्विज, न्युजलेटर, टीएमएस सिमुलेटर, पोर्टफोलियो व्यवस्थापन तथा शेयरको प्राविधिक विश्लेषणसम्बन्धी विभिन्न सुविधा उपलब्ध छन्।

वास्तविक पैसा नलगाई टीएमएसमा अभ्यास

प्लेटफर्मको मुख्य आकर्षणमध्ये एक टीएमएस सिमुलेटर हो। शेयर बजारमा प्रवेश गर्न चाहने धेरै व्यक्तिलाई टीएमएस चलाउने, अर्डर राख्ने, मूल्य छान्ने तथा शेयर खरिद–बिक्री गर्ने प्रक्रियाबारे सुरुमा अन्योल हुने गर्छ। वास्तविक बजारमा सिक्ने क्रममा गलत निर्णय भयो भने त्यसको असर सीधै आफ्नो पैसामा पर्न सक्छ।

टीएमएस सिमुलेटरमा भने प्रयोगकर्ताले अभ्यासका लागि उपलब्ध रकम प्रयोग गरेर वास्तविक टीएमएसजस्तै वातावरणमा शेयर किनबेच गर्न सक्छन्। कम्पनी छान्ने, खरिद वा बिक्री अर्डर राख्ने, आफ्नो कारोबार हेर्ने तथा विभिन्न रणनीति परीक्षण गर्ने सुविधा भएकाले वास्तविक पैसा लगाउनुअघि अभ्यास गर्न सकिन्छ।

सिमुलेटरमा गरिएको कारोबार पोर्टफोलियो प्रणालीसँग समेत जोडिने भएकाले प्रयोगकर्ताले आफूले किनेका शेयर, खरिद मूल्य, बिक्री, नाफा–घाटा तथा समग्र पोर्टफोलियोमा परेको प्रभाव अभ्यासकै क्रममा हेर्न सक्छन्।
लगानी शिक्षा प्रयोग गर्न यहाँ क्लिक गर्नुहोस्

डिजिटल पुस्तकमार्फत विषयअनुसार अध्ययन

शेयर बजारमा प्रयोग हुने धेरै शब्द तथा अवधारणा बारम्बार सुनिए पनि सबैलाई त्यसको वास्तविक अर्थ स्पष्ट नहुन सक्छ। यही कुरालाई ध्यानमा राख्दै ‘लगानी शिक्षा’मा विभिन्न विषयलाई छुट्टाछुट्टै डिजिटल पुस्तकका रूपमा तयार गरिएको छ।

डिजिटल पुस्तकमा शर्ट सेलिङ, इन्ट्राडे ट्रेडिङ, मार्जिन ट्रेडिङ, अड लट कारोबार, ओटीसी बजार, ब्लु चिप शेयर, बजार पूँजीकरण, प्रतिशेयर आम्दानी, डब्ल्यूएसीसी, बुक क्लोज, आईपीओ, बुक बिल्डिङलगायत विषय समेटिएका छन्। त्यस्तै प्राविधिक विश्लेषणअन्तर्गत क्यान्डलस्टिक प्याटर्न, सपोर्ट र रेसिस्टेन्स, ट्रेन्ड विश्लेषण, चार्ट प्याटर्न, मुभिङ एभरेज, डाइभर्जेन्स, प्रवेश बिन्दु, स्टप लस तथा लक्ष्य निर्धारण जस्ता विषय पनि अध्यायगत रूपमा अध्ययन गर्न सकिन्छ।

आधारभूत विश्लेषणसम्बन्धी सामग्रीमार्फत कम्पनीको व्यवसाय, आम्दानी, नाफा, वित्तीय विवरण, ऋण, नगद प्रवाह, प्रतिशेयर आम्दानी, नेटवर्थ, मूल्य–आम्दानी अनुपात, आरओई, वृद्धि, मूल्याङ्कन तथा अन्य कम्पनीसँग तुलना गर्ने तरिकासमेत सिक्न सकिने गरी सामग्री विकास भइरहेको छ।

कम्पनीको प्राविधिक अवस्था एउटै ठाउँमा

प्लेटफर्ममा शेयरको प्राविधिक सूचक विश्लेषण हेर्न सकिने सुविधा पनि उपलब्ध छ। प्रयोगकर्ताले कम्पनी छनोट गरेर विभिन्न प्राविधिक सूचकको अवस्था एउटै तालिकामा हेर्न सक्छन्। यसमा मुभिङ एभरेज, आरएसआई, स्टोकास्टिक आरएसआई, एमएसीडी, सीसीआई, विलियम्स प्रतिशत आर, मोमेन्टम, रेट अफ चेन्ज, एटीआर, एडीएक्स, बोलिन्जर ब्यान्ड, केल्टनर च्यानल, डोनचियन च्यानल, एमएफआई, ओबीभी, सीएमएफ लगायत विभिन्न सूचक समावेश छन्।

यससँगै सपोर्ट, रेसिस्टेन्स, स्विङ हाई, स्विङ लो, सुपरट्रेन्ड तथा बजार संरचनासम्बन्धी जानकारी पनि एउटै ठाउँमा हेर्न सकिने व्यवस्था छ। यसले विभिन्न सूचक छुट्टाछुट्टै खोजेर अध्ययन गर्नुपर्ने झन्झट कम गर्न सहयोग गर्छ।

कृत्रिम बुद्धिमत्ताबाट प्राविधिक विश्लेषण

‘लगानी शिक्षा’मा कृत्रिम बुद्धिमत्तामा आधारित प्राविधिक विश्लेषणसमेत उपलब्ध छ। उपलब्ध बजार तथ्यांक तथा विभिन्न प्राविधिक सूचकलाई आधार बनाएर कम्पनीको प्राविधिक अवस्था बुझ्न यसले सहयोग गर्छ। यसको उद्देश्य प्रयोगकर्तालाई सिधै शेयर किन्ने वा बेच्ने निर्णय गराउनु नभई बजारको अवस्था, प्रवृत्ति र विभिन्न सूचकले देखाइरहेको संकेतलाई सहज रूपमा बुझ्न मद्दत गर्नु हो।

पोर्टफोलियो पनि व्यवस्थापन गर्न सकिने

शेयर किनेपछि आफ्नो लगानी कहाँ कति छ, कुन शेयरले नाफा दिएको छ, कुनमा घाटा भइरहेको छ र समग्र पोर्टफोलियोको अवस्था कस्तो छ भन्ने कुरा बुझ्न पोर्टफोलियो व्यवस्थापन तथा विश्लेषण सुविधा पनि प्लेटफर्ममा राखिएको छ। यसले प्रयोगकर्तालाई केवल शेयर किन्न सिकाउनेभन्दा पनि आफ्नो लगानी व्यवस्थित रूपमा हेर्ने र निर्णयको प्रभाव बुझ्ने अभ्यास गराउने उद्देश्य राखेको छ।

https://ebook.nepsebajar.com/l/ls

भिडियो, क्विज र न्युजलेटर पनि

पढेर मात्रै सिक्न कठिन हुने विषयका लागि ‘लगानी शिक्षा’मा भिडियो सामग्री उपलब्ध छन्। विशेषगरी प्राविधिक चार्ट तथा उन्नत प्राविधिक विश्लेषणसम्बन्धी विषय भिडियोमार्फत बुझ्न सकिन्छ। त्यस्तै क्विजमार्फत आफूले पढेको विषय कति बुझियो भनेर परीक्षण गर्न सकिन्छ भने न्युजलेटरमार्फत शेयर बजारसँग सम्बन्धित उपयोगी शैक्षिक सामग्री तथा विभिन्न विषयको विस्तृत जानकारी पढ्न सकिन्छ।

यसरी प्रयोगकर्ताले एउटै प्लेटफर्ममा पुस्तक पढ्न, भिडियो हेर्न, क्विज दिन, कम्पनी विश्लेषण गर्न, पोर्टफोलियो व्यवस्थापन गर्न र टीएमएस सिमुलेटरमा शेयर किनबेचको अभ्यास गर्न सक्छन्।

नेप्से बजारका अनुसार ‘लगानी शिक्षा’लाई क्रमशः थप विषय, डिजिटल पुस्तक तथा प्रयोगात्मक सुविधासहित विस्तार गर्दै लैजाने योजना छ। शेयर बजार सिक्नका लागि विभिन्न वेबसाइट, भिडियो र सामग्री छुट्टाछुट्टै खोज्नुपर्ने अवस्थालाई कम गर्दै आवश्यक अध्ययन र अभ्यास एउटै ठाउँमा उपलब्ध गराउने उद्देश्यले प्लेटफर्म विकास गरिएको हो।

शेयर बजारबारे सिक्न चाहनेदेखि दोस्रो बजारमा वास्तविक पैसा लगाउनुअघि अभ्यास गर्न चाहनेसम्मका प्रयोगकर्ताले ebook.nepsebajar.com मार्फत ‘लगानी शिक्षा’ प्रयोग गर्न सक्नेछन्।