माया खोला हाइड्रोपावर कम्पनी लिमिटेडकाे आईपीओ भाेलि बाँडफाँट हुने भएकाे छ ।

कम्पनीले माघ १३ गतेदेखि माघ १७ गतेसम्म सर्वसाधारणका लागि निष्कासन गरेकाे आईपीओ भाेलि बाँडफाँट हुने भएको हो। कम्पनीले दोस्रो चरणमा सर्वसाधारणका लागि माघ १३ गतेदेखि आईपीओ निष्कासन खुल्ला गरेको थियो । कम्पनीले जारी पूँजीको रू.१ अर्बको ३४ प्रतिशतले हुन आउने रू. ३४ करोड बरारबको ३४ लाख कित्ता शेयर आईपीओ निष्काशनका लागि छुट्याएको थियो ।

कम्पनीकाे आईपीओमा  १३ लाख ९७ हजार ७२३ जना लगानीकर्ताहरूले कुल १ करोड ५८ लाख ६३ हजार ८१० कित्ताका लागि आवेदन दिएका छन् जुन माग भन्दा ७.९६ गुणा बढी हो । मागभन्दा धेरै आवेदन परेकाे हुनाले कम्पनीकाे आईपीओ गाेलाप्रथाद्वारा बाँडफाँट गर्दा भाग्यमानी १ लाख ९९ हजार २ सय जना लगानीकर्ताहरूले मात्रै सेयर हात पार्नेछन् भने बाँकी ११ लाख ९८ हजार ५२३ जना लगानीकर्ताहरूको भने हात खाली हुनेछ ।

इक्रा नेपालले कम्पनीलाई आईपीओ निष्काशनका लागि गराएको रेटिङ्गमा इक्रा एनपी इस्यूअर रेटिङ्ग डबल बी माइनस रेटिङ्ग प्रदान गरेको छ । यसले कम्पनीको वित्तीय दायित्व बहन गर्ने क्षमतामा औषत जोखिम रहेको संकेत देखाउँछ ।

कम्पनीको शेयर निष्काशन तथा बिक्री प्रबन्धक प्रभु क्यापिटल लिमिटेड रहेको छ । कम्पनीले प्रबर्धन गरिरहेको १४ दशमलव ९ मेगावाटको माया खोला जलविद्युत आयोजनाको प्रति मेगावाट लागत निर्माण अवधिको ब्याजसहित रू.२० करोड १३ लाख ४२ हजार रहेको छ ।