नेपाली उपभोक्ता बजारमा अग्रणी सुपरमार्केट भाटभटेनीले अन्तर्राष्ट्रिय स्तरको सेवा प्रवाहलाई आत्मसात् गर्दै आफ्ना स्टोरलाई २४सै घण्टा सञ्चालन गर्ने महत्वाकांक्षी योजना सार्वजनिक गरेको छ।

यो अभ्यास पहिलो चरणमा यही साउन २७ गते (बुधबार) देखि भक्तपुर शाखाबाट आरम्भ हुनेछ। भाटभटेनी सुपरमार्केटका सञ्चालक कल्याण गुरुङका अनुसार, भक्तपुर शाखालाई यसका लागि ‘पाइलट प्रोजेक्ट’का रूपमा छनोट गरिएको छ। यस अभ्यासको सफलतापश्चात् यसलाई क्रमशः बौद्ध, टंगाल, कोटेश्वर, पाटन लगायतका काठमाडौँ उपत्यकाका प्रमुख स्टोरहरूमा विस्तार गरिनेछ। साथै, पोखरा, बुटवल, नारायणगढजस्ता देशका अन्य प्रमुख सहरका स्टोरहरूमा समेत यो सेवा उपलब्ध गराइने गुरुङले जानकारी दिए।

हाल दैनिक बिहान ७:३० देखि राति ९ बजेसम्म सञ्चालनमा रहेको सुपरमार्केट २४सै घण्टा खुला रहने हुँदा उपभोक्ताहरूलाई किनमेलका लागि थप सहजता पुग्ने अपेक्षा गरिएको छ। रातिको समयमा सामान मिलाउने, मूल्य ट्याग गर्ने, सरसफाइ र आपूर्ति व्यवस्थापनजस्ता आवश्यक कार्यहरू सम्पन्न गरिने भएकाले दिउँसोको समयमा ग्राहकहरूलाई किनमेलका क्रममा कुनै पनि असहजता नहुने कम्पनीले विश्वास व्यक्त गरेको छ।

यसका लागि, रातिको सिफ्टमा कार्यसम्पादन गर्ने एक छुट्टै ‘कोर टिम’ गठन गरिएको छ। यस टोलीमा आवद्ध कर्मचारीहरूले नियमित तलबमा २५ प्रतिशत अतिरिक्त पारिश्रमिक पाउनेछन्। यसका साथै, उनीहरूलाई चिया-खाजाको सुविधासमेत प्रदान गरिनेछ। यसबाट रात्रिकालीन सेवा प्रवाहमा संलग्न कर्मचारीहरूलाई प्रोत्साहन मिल्ने र कार्यसम्पादनमा थप प्रभावकारिता आउने विश्वास गरिएको छ।