राष्ट्रिय पर्वको रुपमा मनाइने धान दिवस अर्थात असार १५ गतेको दिन ( हिजो ) सरकारले तोकेको न्यूनतम ज्याला नपाएको भन्दै घोराही सिमेन्ट उद्योगका श्रमिकले दाङमा प्रदर्शन गरेका छन् ।

श्रमिकहरूले शनिबार घोराही उपमहानगरपालिकाको गोग्लीस्थित घोराही सिमेन्ट उद्योग मूल गेटमा प्रदर्शन गरेका हुन् ।

नेपाल स्टक एक्सचेञ्जमा समेत सूचीकृत घोराही सिमेन्ट उद्योगले त्यहाँ कार्यरत सयौं श्रमिकहरुलाई वर्षौदेखि बीचमा श्रमिक सप्लायर्स कम्पनी खडा गरी सरकारले तोकेको न्यूनतम ज्यालामा ठगी गर्दै आएको आरोप छ ।प्रदर्शनकारी मजदुरहरूले सरकारले दैनिक ६६८ रुपियाँ न्यूनतम ज्याला तोकेको भएपनि उद्योगले बीचमा श्रमिक सप्लायर्स कम्पनी खडा गरी वर्षौंदेखि प्रतिव्यक्ति प्रतिदिन २०० रुपियाँसम्म ठगी गरेको बताएका छन् ।

श्रमिकहरूले न्यूनतम पारिश्रमिक, बैंक खातामा तलब भुक्तानी, सामाजिक सुरक्षा कोष र वातावरण संरक्षण जस्ता माग राखेका छन् । सिमेन्ट उद्योगका श्रमिकहरुले आफ्ना माग पूरा नभए अझ कडा आन्दोलन गर्ने र उद्योगमा ताला लगाउनेसम्मको चेतावनी समेत दिएका छन् ।