एभरेष्ट बैंक लिमिटेडले भोलि सोमवारबाट १० वर्षे अवधिको ऋणपत्र निष्कासन गर्ने भएको छ ।

वार्षिक साढे ७ प्रतिशत ब्याजदरमा बैंकले रू. १ हजार अंकित दरको रू. २ अर्ब बराबरको २० लाख कित्ता ‘एभरेष्ट बैंक लिमिटेड ऊर्जा ऋणपत्र २०८९’ नामको ऋणपत्र निष्कासन गर्न लागेको हो । कुल कित्ता ऋणपत्रमध्ये १२ लाख कित्ता व्यक्तिगत तवरबाट बिक्री गरिनेछ भने बाँकी ८ लाख कित्ता सर्वसाधारणमा विक्री गरिनेछ ।

सर्वसाधारणका लागि निष्कासन गरिने ऋणपत्रमध्ये पनि ४० हजार कित्ता ऋणपत्र सामूहिक लगानी कोषहरूका लागि छुट्याइएको छ । यो ऋणपत्र खरीदका लागि न्यूनतम २५ कित्तादेखि अधिकतम सम्पूर्ण कित्तासम्म  छिटोमा पुस २८ गतेसम्मआवेदन दिन सकिने छ। सो अवधिसम्म मागबमोजिम आवेदन नपरेमा भने ढिलोमा माघ ९ गतेसम्म विक्री अवधि लम्बिनेछ ।

धितोपत्र निष्कासन तथा विक्री प्रबन्धक लक्ष्मी क्यापिटल मार्केट लिमिटेड रहेको छ । लगानीकर्ताले ऋणपत्रमा नेपाल धितोपत्र बोर्डबाट स्वीकृति प्राप्त आस्बा सेवामा सहभागी सम्पूर्ण बैंक तथा वित्तीय संस्था र तिनका तोकिएका शाखा कार्यालयहरूसँगै मेरो शेयर अनलाइनमार्फत पनि आवेदन दिन सकिनेछ ।

केयर नेपालले बैंकलाई ऋणपत्र निष्कासनका लागि गराएको क्रेडिट रेटिङमा  न्यून कर्जा जोखिम रहेको संकेत गर्ने केयर एनपी डबल ए माइनस रेटिङ प्रदान गरेको छ ।