नेपाल इन्फ्रास्ट्रक्चर बैंक लिमिटेडले निष्कासन गरेको ऋणपत्र खरीदका लागि आवेदन दिने आज अन्तिम दिन रहेको छ ।

बैंकले मंसिर २९ गतेदेखि वार्षिक ७ प्रतिशत ब्याजदरको ‘निफ्रा ऊर्जा ऋणपत्र ७ प्रतिशत २०८५/८६’ नामको ऋणपत्र जारि गरेको थियो।ऋणपत्रमा आर्जित ब्याज रकम प्रत्येक आर्थिक वर्षको प्रथम अर्थवार्षिक र दोस्रो अर्धवार्षिक समाप्त भएपश्चात् कर कट्टा गरी भुक्तानी गरिने बैंकको भनाइ छ ।

बैंकले प्रतिऋणपत्र रू. १  हजार अंकित दरका रू. ५ अर्ब बराबरको ५० लाख कित्ता ऋणपत्र निष्कासन गरेको हो । निष्कासन हुने कुल कित्तामध्ये ६० प्रतिशत अर्थात् रू. ३ अर्ब बराबरको ३० लाख कित्ता बैंक आफैले व्यक्तिगत तवरबाट विक्री गर्नेछ भने बाँकी ४० प्रतिशत अर्थात् रू. २ अर्ब बराबरको २० लाख कित्ता सर्वसाधारणमा विक्री गर्न लागिएको हो  सर्वसाधारणमा विक्री गरिने मध्य १ लाख कित्ता ऋणपत्र सामूहिक लगानी कोषहरूका लागि छुट्याएर बाँकी कित्ता सर्बसाधारणको लागि सुरक्षित गरिएको छ।

ऋणपत्रको विक्री प्रबन्धकमा एनआईबिएल एस क्यापिटल लिमिटेड रहेको छ । ऋणपत्र खरीदका लागि लगानीकर्ताले न्यूनतम २५ कित्तादेखि अधिकतम १ लाख कित्तासम्मको लागि आवेदन दिन सक्नेछन् ।

कम्पनीको ऋणपत्र निष्कासनका लागि गराएको क्रेडिट रेटिङ्गमा इक्रा नेपालले मध्यम कर्जा जोखिम रहेको संकेत गर्ने इक्राएनपी इस्यूअर रेटिङ्ग ट्रिपल बी प्रदान गरेको छ ।