पोखरा महानगरपालिका–६ लेकसाईड बाराही चोकस्थित एनएमबी बैंकको एटिएम फुटाउँदै गरेको अवस्थामा एक जनालाई प्रहरीले पक्राउ गरेको छ ।

पक्राउ पर्नेमा धादिङ त्रिपुरा सुन्दरी गाउँपालिका–५ सल्यानटार घर भएका २५ वर्षीय मनोज कुमाल छन् । उनलाई गएराति प्रहरीले पक्राउ गरेको हो । वडा प्रहरी कार्यालय बैदामबाट खटिएको प्रहरीले उनलाई एटिएम फुटाउँदै गरेको अवस्थामा एक थान खुकुरी सहित फेला पारी पक्राउ गरेको हो ।

घटनाका सम्बन्धमा प्रहरीले थप अनुसन्धान गरिरहेको छ । यसअघि गत साउन ३ गते पोखरामा एकैरातमा दुईवटा बैंकको एटिएममा चोरीका घटना घटेको थियो । २१ वर्षिय अनिस तामाङले गत साउन ३ गते राती पोखराको अर्घौ चोकस्थित एमएमबी बैंककै एटिएमबाट झण्डै १५ लाख चोरी गरेका थिए ।