स्वास्थ्य मन्त्रालयले चितवन सहित १४ जिल्लाका विद्यालय बन्द गर्न सिफारिस गरेको छ ।

मन्त्रालयले आज जारी गरेको अत्यन्त जरुरि अपिलमा चितवनसहित काठमाडौँ, रुपन्देही, कास्की, भक्तपुर, कैलाली, मोरङ, दाङसहितका १४ जिल्लाका शिक्षण संस्था बन्द गर्न सिफारिस गरेको छ ।

अपिलमा मन्त्रालयले सबै १४ जिल्लामा रेष्टुरेन्ट, क्लबहरु, जात्रा, पर्व, नाँचघर, पार्टी प्यालेसलगायत सबै भीडभाड हुने स्थानमा नगएर स्वास्थ्य मापदण्ड कडारुपमा पालन गर्न सबैमा अपिल गरेको छ । कोभिडको संक्रमणबाट जोगिन संवेदनशिल बनेर जनस्वास्थ्यका मापदण्ड पालन गर्न गराउन मन्त्रालयको अपिल छ ।

सरकारी तथ्याङ्क अनुसार बुधबार २४ घण्टामा ६०३ जनामा कोरोना संक्रमण पुष्टि भएको छ । ती मध्ये २५४ जना मात्र काठमाडौँ उपत्यका छन् । कोरोना संक्रमणबाट ३ जनाको मृत्यु भएको छ। यसअघि गत चैत्र १४ गते संक्रमितको संख्या घटेर ४८ मा झरेको थियो। कोरोनाका दोस्रो लहर सुरु भएपछि विज्ञहरु पनि चिन्तित छन् ।

महाराजगञ्जस्थित कान्ति बाल अस्पतालका निर्देशक एवम् बालरोग विशृेषज्ञ डा. आरपी विच्छाले हाल धेरै बालबालिका प्रभावित हुन थालेको बताए । त्यसका लागि तत्काल स्कूल बन्द गर्नुपर्ने उनको सुझाव छ । तर स्कूल र अभिभावक मिलेर अनलाइन कक्षा प्रभावकारी नबनाएमा पुनः बालबालिकामा अन्य किसिमका समस्याहरु देखिन सक्नेमा पनि विज्ञहरु उत्तिकै चिन्तित छन् ।