साताको चौथो कारोबार दिन बुधवार बुद्धभुमि नेपाल हाइड्रोपावरको शेयरमूल्य मा सकारात्मक सर्किट लागेको छ ।
कम्पनीको शेयरमूल्य आज ९.९७ प्रतिसतले बढेको हो। कम्पनीको शेयरमूल्य प्रतिकित्ता रू.२८७ दशमलव ८ ० पुगेको हो । कम्पनीको शेयरमा विक्रेताभन्दा क्रेता धेरै भएकाले शेयरमूल्य बढेको हो । मार्केट डेप्थमा हेर्दा पनि कम्पनीको शेयरमा ३ लाख ३ १ हजार ५२ कित्ता शेयर खरीद माग रहेको छ भने विक्री माग शून्य रहेको छ ।
कम्पनीको शेयर दोस्रो बजारमा मंगलवारदेखि कारोबारमा आएको हो । नेप्सेले कम्पनीको पहिलो कारोबारको लागि रू. ८४ दशमलव ५ देखि २५२ दशमलव १५ ओपन रेञ्ज तोकेको थियो । सोही मूल्य रेञ्जका आधारमा कारोबार शुरु भएको हो । कम्पनीको कारोबार सिम्बोल बीएनएचसी स्टक कोडबाट कारोबार भएको छ । कम्पनीले आइतवार ४० लाख कित्ता शेयर सूचीकरण गराएको थियो ।
सोमवार प्रि – ओपन सेसनमा कारोबार हुनु पर्नेमा म्याचिङ नभएका कारण शेयर कारोबार हुन सकेको थिएन । मंगलवार प्रि ओपन सेसनमा म्यचिङ भएर नियमित समयमा कारोबार भएको हो ।
कम्पनीले सर्वसाधारणतर्फ ८ लाख कित्ता, उद्योग प्रभावित क्षेत्रका बासिन्दाका लागि निष्कासन गरेको ४ लाख कित्ता र कम्पनीका संस्थापकहरुले लगानी गरेको २८ लाख कित्ता गरेर कुल ४० लाख कित्ता साधारण शेयर नेप्सेमा सूचीकृत गराएको छ ।