बागमती प्रदेशका ३ जिल्लामा भोलि शुक्रबारदेखि लगातार पाँच दिन सार्वजनिक बिदा हुने भएको छ।

विभिन्न पर्व, नियमित साप्ताहिक बिदा र स्थानीय रूपमा लागू हुने सार्वजनिक बिदा लगातार परेपछि यी तीन जिल्लामा पाँच दिन लामो बिदा परेको हो। भदौ १९ गते शुक्रबारदेखि बिदा सुरु हुनेछ। भदौ १९ गते शुक्रबार गौरा पर्व र श्रीकृष्ण जन्माष्टमीका अवसरमा देशभर सार्वजनिक बिदा रहेको छ। त्यसपछि भदौ २० गते शनिबार र २१ गते आइतबार नियमित साप्ताहिक बिदा परेको छ।

यसैबीच, भदौ २२ गते सोमबार भने चितवन, मकवानपुर र धादिङ जिल्लामा मात्रै सार्वजनिक बिदा हुनेछ। चेपाङ समुदायको प्रमुख सांस्कृतिक पर्व न्वागी (छोनाम) का अवसरमा बागमती प्रदेश सरकारले यी तीन जिल्लामा सार्वजनिक बिदा दिने निर्णय गरेको हो।

प्रदेशको आन्तरिक मामिला तथा कानुन मन्त्रालयले राजपत्रमा सूचना प्रकाशित गर्दै न्वागी पर्वका अवसरमा चितवन, मकवानपुर र धादिङमा सार्वजनिक बिदा दिने व्यवस्था गरेको छ। न्वागी चेपाङ समुदायले परम्परागत रूपमा मनाउँदै आएको महत्वपूर्ण सांस्कृतिक पर्व हो।

भदौ २२ गतेपछि भदौ २३ गते मंगलबार जेनजी आन्दोलनका शहीदहरूको सम्मानमा देशभर सार्वजनिक बिदा रहेको छ। यसरी अन्य बिदासँग न्वागी पर्वको बिदा जोडिँदा चितवन, मकवानपुर र धादिङका नागरिकले शुक्रबारदेखि मंगलबारसम्म लगातार पाँच दिन बिदा पाउने भएका हुन्।

यसरी लगातार पाँच दिनको बिदा भने देशभर होइन, भदौ २२ गतेको विशेष बिदा लागू हुने चितवन, मकवानपुर र धादिङ जिल्लामा मात्र परेको हो। अन्य जिल्लामा भदौ २२ गते सोमबार नियमित रूपमा सरकारी कार्यालय तथा सार्वजनिक निकाय सञ्चालन हुनेछन्।

पाँच दिनको बिदापछि चितवन, मकवानपुर र धादिङमा सरकारी कार्यालय तथा सार्वजनिक निकायहरू भदौ २४ गते बुधबारदेखि नियमित रूपमा सञ्चालन हुनेछन्।