चुनाव नजिकिदै छ।

चुनावको प्रचारको माहोल बनिरहेको बेला विराटनगरको एउटा टोलमा उम्मेदवारलाई प्रवेश निषेध गर्ने अभियाननै चलेको छ। कोसी लोकमार्गबाट पश्चिमा पर्ने विराटनगर महानगरपालिका– ४ र ५ को सिमानास्थित जामुनगाछी क्षेत्रमा राजनीतिक दलका नेताविरुद्धको आन्दोलन स्थानीयले जारी राखेका हुन्। कोसी राजमार्ग पश्चिमको क्षेत्रलाई विकासबाट वञ्चित गराएको भन्दै स्थानीयबासिन्दाले नेताको फोटो सहितको ब्यानर टाँसेका छन् ।

स्थानीयले २०७८ कात्तिकबाटै ‘नेता बहिष्कार’ अभियान सुरू गरेका थिए। वैशाख ३० मा सम्पन्न स्थानीय तह निर्वाचनमा पनि आन्दोलनले निरन्तरतापाएको थियो । ‘२०४६ सालदेखि बारम्बार सत्तामा बसेर पनि हाइवे पश्चिम केही विकास नगरी हाइवे पश्चिमलाई विकासबाट बञ्चित गराएर भेदभाव गरेर सामाजिक, कानुनी र नैतिक अपराध गर्ने जनताका अपराधी नेताहरूलाई चिनिराखौं,’ स्थानीयबासिन्दाले राखेको ब्यानरमा लेखिएको छ।

नेताहरुले आफूहरुलाई भोट बैंकका रूपमा मात्रै प्रयोग गरेको र विकास निर्माणमा अवरोध गरिरहेको आरोप स्थानीयको छ। राजनीतिक पार्टी र विकास विरोधी नेताहरुलाई गाउँ, क्षेत्र प्रवेशमा रोक लगाइएको ब्यानरसहित स्थानीयले अभियान सुरू गरेका थिए। सडक निर्माणको ठेक्का लिएर काम नगर्ने ठेकेदारहरुलाई पनि नेताहरुले कारबाही नगरी संरक्षण गरेको आरोप उनीहरुको छ।