गृहमन्त्री सुधन गुरुङले बुधबार प्रधानमन्त्री बालेन्द्र शाह (बालेन) सँग उच्चस्तरीय छलफल गरेका छन्। प्रधानमन्त्री तथा मन्त्रिपरिषद्को कार्यालयमा जारी यो छलफल सुरक्षा व्यवस्था र सुशासनका विषयमा केन्द्रित रहेको अनुमान गरिएको छ।

मन्त्री गुरुङको सचिवालयका अनुसार, करिब २० मिनेटदेखि दुई नेताबीच विचारविमर्श भइरहेको छ। छलफलको विस्तृत विषयवस्तु बाहिर नआए पनि, यसको मुख्य जोड मुलुकको शान्ति सुरक्षा मजबुत पार्ने र सुशासन कायम गर्ने सवालमा रहेको मन्त्री गुरुङका एक निकट सहयोगीले बताए।

यसअघि मंगलबार, गृहमन्त्री गुरुङले नेपाल प्रहरीका महानिरीक्षक, गृहसचिव, र काठमाडौंका प्रमुख जिल्ला अधिकारीलगायत सुरक्षा निकायका उच्च अधिकारीहरूसँग करिब पाँच घण्टा लामो बैठक गरेका थिए।

यसैबीच, बिचौलिया व्यवसायी दीपक भट्टसँगको साझेदारी र उनी संलग्न कम्पनीमा मन्त्री गुरुङको सेयर रहेको तथ्य सार्वजनिक भएपछि उनको आलोचना भइरहेको छ। यस्तो परिप्रेक्ष्यमा, प्रधानमन्त्रीसँगको यो छलफललाई थप महत्वका साथ हेरिएको छ।