काठमाडौं, २४ जेठ ।  इन्फिनिटी लघुवित्त वित्तीय संस्था लिमिटेडले संस्थागत समूहअन्तर्गतको २५ हजार कित्ता संस्थापक सेयर बिक्रीका लागि खुला गरेको छ। विशेष कुरा के छ भने यस सेयर खरिदमा संस्थापक सेयरधनीसँगै सर्वसाधारण लगानीकर्ताले पनि सहभागिता जनाउन सक्नेछन्।

संस्थाले जारी गरेको सूचनाअनुसार इच्छुक व्यक्ति वा संस्थाले आफूले खरिद गर्न चाहेको सेयर संख्यासहित आवेदन पेश गर्न सक्नेछन्। आवेदन नवलपरासीको गैँडाकोटस्थित संस्थाको केन्द्रीय कार्यालयमा बुझाउनुपर्ने व्यवस्था गरिएको छ।

सेयर खरिदका लागि इच्छुक लगानीकर्ताले सूचना प्रकाशित भएको मितिले १५ दिनभित्र बोलपत्र आवेदन पेश गर्नुपर्नेछ। तोकिएको अवधिभित्र प्राप्त आवेदनका आधारमा सेयर बिक्री प्रक्रिया अगाडि बढाइने संस्थाले जनाएको छ।

संस्थापक सेयरको बिक्री मूल्य भने प्रचलित कानुनी व्यवस्था तथा नियामकीय प्रावधानअनुसार निर्धारण गरिने उल्लेख गरिएको छ।

यस बिक्री प्रक्रियामार्फत संस्थागत समूहको स्वामित्वमा रहेको सेयर नयाँ लगानीकर्तामा हस्तान्तरण हुने बाटो खुलेको छ।