सिटिजन लाइफ इन्स्योरेन्सको आईपीओ आज बाँडफाँट हुने भएको छ।

कम्पनीले भदौ १५ गतेदेखि १९ गतेसम्म सर्वसाधारणमा विक्री गरेको आईपीओ आज दिउँसो २ बजे विक्री प्रबन्धक एनआइएमबि एस क्यापिटल लिमिटेडको कार्यालयमा बाँडफाँट हुने भएको हो। कम्पनीको आईपीओमा १५ लाखभन्दा बढीको आवेदन परेको हुदा भाग्यमानी ९ लाख लगानीकर्ताले गोलाप्रथाको माध्यमबाट १०-१० कित्ताका दरले कम्पनीको आईपीओ प्राप्त गर्नेछन् भने ६ लाखभन्दा बढी आवेदकहरूको हात भने खाली हुने देखिएको छ ।

कम्पनीले सर्वसाधारणमा प्रतिशेयर १०० रुपैयाँ अंकित मूल्यमा प्रिमियमबापत १४४ रुपैयाँ थप गरी प्रतिकित्ता २४४ रुपैयाँमा ९० लाख कित्ता आईपीओ विक्री गरेको थियो  ।  १ अर्ब १२ करोड ५० लाख रुपैयाँ बराबरको १ करोड १२ लाख ५० हजार कित्ता आईपीओ निष्कासन गर्न अनुमति पाएको कम्पनीले कर्मचारीमा प्रतिशेयर १०० रुपैयाँमा ५ लाख ६२ हजार ५०० कित्ता आईपीओ विक्री बाँडफाँट गरिसकेको छ ।

यसका साथै १ करोड ६ लाख ८७ हजार ५०० कित्ता आईपीओमध्ये ११ लाख २५ हजार कित्ता वैदेशिक रोजगारीमा रहेका नेपालीका लागि र ५ लाख ६२ हजार ५०० कित्ता सामूहिक लगानीकोषका लागि समेत बाँडफाँट गरिएको छ ।

यो आइपीओमा एनआइएमबी एस क्यापिटल बिक्री प्रबन्धक रहेको छ । रेटिङ एजेन्सी इक्रा नेपालले यस इन्स्योरेन्सलाई ‘इक्राएनपी ट्रिपल बी इस्यूअर रेटिङ’ प्रदान गरेको छ । जसले कम्पनीको दायित्व बहन गर्ने क्षमतामा मध्यमस्तरको जोखिम रहेको जनाउँछ ।