भारतको ओडिशा राज्यस्थित केओन्झार जिल्लामा बैंकिङ प्रक्रियाको जटिलता र जनचेतनाको अभावले स्तब्ध बनाउने घटना सार्वजनिक भएको छ।

दियानाली गाउँका जीतु मुन्डा नामका एक व्यक्तिले मृत दिदी कलरा मुन्डाको बैंक खातामा रहेको करिब १९ हजारदेखि २० हजार भारतीय रुपैयाँ निकाल्न पटक–पटक प्रयास गर्दा बैंकबाट आवश्यक प्रक्रिया स्पष्ट रूपमा नबुझाइएपछि अन्ततः दिदीको चिहान खनेर कंकाल नै बैंकमा ल्याएका हुन्।

रिपोर्टअनुसार जीतुकी दिदीको मृत्यु जनवरी २६ मा भएको थियो। उनी दिदीको खातामा रहेको रकम निकाल्न मलिपोसीस्थित ओडिशा ग्रामीण बैंक शाखा पुगेका थिए। तर बैंक कर्मचारीले खाता धनी स्वयं उपस्थित हुनुपर्ने वा कानुनी उत्तराधिकारीसम्बन्धी कागजात आवश्यक पर्ने बताएपछि अशिक्षित र गरिब पृष्ठभूमिका जीतु निराश बने। उनले आफूले दिदीको मृत्युबारे जानकारी दिँदा पनि कुरा नसुनेको आरोप लगाएका छन्।

घटनापछि बैंक परिसरमा त्रास फैलिएको थियो भने प्रहरीले हस्तक्षेप गरेर जीतुलाई आवश्यक कानुनी प्रक्रिया बुझाउने र रकम निकासामा सहयोग गर्ने आश्वासन दिएको छ। स्थानीय प्रशासनले पनि घटनाले ग्रामीण तथा आदिवासी समुदायमा बैंकिङ सेवा पहुँच, वित्तीय साक्षरता र संवेदनशील सेवाको ठूलो प्रश्न उठाएको जनाएको छ।

यो घटनाले केवल एक व्यक्तिको पीडा मात्र होइन, औपचारिक बैंकिङ प्रणाली र ग्रामीण वास्तविकताबीचको दूरी कति गम्भीर छ भन्ने उजागर गरेको छ। सामाजिक सञ्जालमा यो समाचार तीव्र रूपमा भाइरल बनेको छ भने बैंकिङ प्रणालीलाई मानवीय, स्पष्ट र पहुँचयोग्य बनाउनुपर्ने बहस चर्किएको छ।