घलेम्दी हाइड्रोपावर कम्पनी लिमिटेडको २०० प्रतिशत हकप्रद शेयर निष्कासन गर्ने छ।

उक्त सेयर निष्कासनकालागि कम्पनीले विद्युत नियमन आयोगले असार १३ गते स्वीकृति प्रदान गरेको छ । साथै उक्त कम्पनीको वैशाख १६ गते सम्पन्न नवौं वार्षिक साधारण सभाले २०० प्रतिशत हकप्रद शेयर निष्कासन गर्ने प्रस्ताव पारित गरिसकेको छ ।

विद्युत नियमन आयोगको स्वीकृति पाएसँगै कम्पनीले अब  हकप्रद निष्कासन गर्नको लागि नियामक निकाय नेपाल धितोपत्र बोर्डमा निवेदन दिने छ। धितोपत्र बोर्डले अनुमति दिएमा उक्त हकप्रद शेयर विक्रीमा आउनेछ । हकप्रद सेयर निष्कासन गर्नको लागि कम्पनीले  विक्री प्रबन्धकमा मुक्तिनाथ क्यापिटल लिमिटेडलाई नियुक्त गरेको छ।

कम्पनीको हालको चुक्ता पूँजी रू. ५५ करोड रहेको छ।  रू. १  अर्ब १० करोडको हकप्रद निष्कासन पछि कम्पनीको पूँजी रू. १ अर्ब ६५ करोड पुग्नेछ । चालू आर्थिक वर्षको तेस्रो त्रैमाससम्म यो कम्पनीको जगेडा कोष रकम रू. ११ करोड ११ लाखभन्दा बढी ऋणात्मक छ भने कम्पनी रू. १ करोड ५५ लाखभन्दा बढी खुद नोक्सानीमा छ ।

हकप्रद शेयर विक्रीबाट संकलित पूँजी सांग्रिला उर्जा लिमिटेडद्वारा प्रवर्द्धित संखुवासभामा रहेको ६३ मेगावाट क्षमताको छुजुङ्ग खोला जलविद्युत आयेजनामा ५१ प्रतिशतभन्दा बढी शेयरमा लगानी गर्ने योजना कम्पनीको छ ।