नेपाल सरकारअन्तर्गत औद्योगिक उद्यम विकास संस्थान (आईईडीआई) को सहकार्यमा आईसीटी फाउन्डेशन नेपाल (आईएफएन) ले “डिजिटल एन्ड आईटी–इनेबल्ड स्टार्टअप इन्क्युबेसन प्रोग्राम २०२६” सञ्चालन गर्ने भएको छ।

देशमा उद्यमशीलता प्रवर्द्धन गर्ने उद्देश्यसहित ल्याइएको यस कार्यक्रममार्फत प्रारम्भिक चरणका ५० भन्दा बढी टेक स्टार्टअपहरूलाई लक्षित गरी तीन महिने विशेष तालिम तथा मार्गदर्शन प्रदान गरिनेछ। कार्यक्रम विशेषगरी बागमती प्रदेशको काठमाडौं उपत्यका र कोशी प्रदेशको इटहरी क्षेत्रका स्टार्टअपहरूलाई केन्द्रमा राखेर सञ्चालन हुनेछ।

मार्चदेखि जुन २०२६ सम्म सञ्चालन हुने यो इन्क्युबेसन कार्यक्रम हाइब्रिड मोडलमा आधारित हुनेछ, जसअन्तर्गत सहभागीहरूले प्रत्यक्ष तथा भर्चुअल दुवै माध्यमबाट सिकाइको अवसर पाउनेछन्। कार्यक्रममा सहभागी स्टार्टअपहरूले अनुभवी उद्योग विज्ञहरूबाट वान-टु-वान मेन्टरशिप, क्षमता अभिवृद्धि तालिम, व्यवसाय विकास तथा भ्यालिडेसन सहयोग, साथै लगानीका लागि तयारी सम्बन्धी प्रशिक्षण प्राप्त गर्नेछन्। यसले स्टार्टअपहरूलाई आफ्नो व्यवसाय मोडल परिष्कृत गर्न, बजार विस्तार गर्न र लगानीकर्तासँग जोडिन मद्दत गर्ने विश्वास गरिएको छ।

कार्यक्रमको अर्को महत्वपूर्ण पक्ष भनेको क्षेत्रीय उद्यमशीलतालाई प्रवर्द्धन गर्नु हो। आयोजकका अनुसार काठमाडौं केन्द्रित अवसरलाई बाहिर विस्तार गर्दै विशेषगरी कम अवसर प्राप्त क्षेत्रका उद्यमीहरूलाई समेत समेट्ने लक्ष्य लिइएको छ। यसले देशभर नवप्रवर्तनको इकोसिस्टमलाई बलियो बनाउने अपेक्षा गरिएको छ।

कार्यक्रममा उत्कृष्ट प्रदर्शन गर्ने स्टार्टअपहरूले सीड इन्भेस्टमेन्टको अवसरसमेत प्राप्त गर्नेछन्। साथै उनीहरूलाई आईसीटी अवार्ड, स्टार्टअप एन्ड आइडिया फेस्ट, नेशनल कन्क्लेभ तथा एआई कन्फरेन्स जस्ता राष्ट्रिय स्तरका प्लेटफर्ममा सहभागी हुने अवसर प्रदान गरिनेछ। यसअघि पनि आईसीटी फाउन्डेशन नेपालले डिजिटल कर्णाली कन्क्लेभ र डिजिटल मधेश कन्क्लेभ जस्ता कार्यक्रममार्फत क्षेत्रीय नवप्रवर्तनमा योगदान दिँदै आएको छ।

उक्त कार्यक्रममा सहभागी हुन इच्छुक स्टार्टअपहरूले निःशुल्क रूपमा आवेदन दिन सक्नेछन्। आवेदन दर्ता गर्ने अन्तिम मिति २०२६ अप्रिल २० (वैशाख ७, २०८३) राति ११:५९ बजेसम्म तोकिएको छ। इच्छुक आवेदकहरूले तोकिएको अनलाइन फारममार्फत आफ्नो व्यक्तिगत विवरण, परियोजनासम्बन्धी जानकारी तथा आवश्यक कागजातहरू पेश गर्नुपर्नेछ।

यस कार्यक्रमले नेपालको स्टार्टअप इकोसिस्टमलाई थप सुदृढ बनाउँदै नवप्रवर्तनमा आधारित आर्थिक विकासलाई गति दिने अपेक्षा गरिएको छ। साथै, यसले नेपाली स्टार्टअपहरूलाई राष्ट्रिय मात्र नभई अन्तर्राष्ट्रिय स्तरमा समेत प्रतिस्पर्धी बनाउन सहयोग पुर्‍याउने विश्वास गरिएको छ। कार्यक्रममा सहभागी हुनका लागि यहाँ क्लिक गरी दर्ता गर्नुहोस् ।