हिमालयन इन्भेष्टमेन्ट बैंकर लिमिटेडले भृकुटी स्टक ब्रोकिङ्ग कम्पनी (ब्रोकर नं. ५५) लाई एचएलआई लार्ज क्याप फण्डको करिब २२ करोड २५ लाख रुपैयाँ फण्ड फिर्ता गर्न अन्तिम ताकेता गरेको छ।

पटक-पटक सेयर खरिदका लागि रकम उपलब्ध गराउँदा पनि भृकुटी स्टकले उक्त रकम लगानीमा प्रयोग नगरेको र हालसम्म फिर्ता नगरेकोले हिमालयन इन्भेष्टमेन्ट बैंकरले यो कडा कदम चालेको हो।

स्पष्ट निर्देशन जारी गर्दै, हिमालयन इन्भेष्टमेन्ट बैंकरले सूचना प्रकाशित भएको मितिले ७ दिनभित्र उक्त रकम, बक्यौता ब्याज र अन्य हर्जानासहित फिर्ता गर्न चेतावनी दिएको छ। यो अवधिभित्र रकम दाखिला नभएमा भृकुटी स्टक ब्रोकिङ्ग कम्पनी र यसका सञ्चालकहरू विरुद्ध तत्काल कानुनी कारबाही प्रक्रिया आरम्भ गरिने बताइएको छ।

यसअघि पनि पटक-पटक गरिएको ताकेतालाई भृकुटी स्टकले बेवास्ता गर्दै आएको थियो। यस सन्दर्भमा सम्बन्धित निकायहरूको ध्यानाकर्षण भएको छ र आगामी दिनमा यसले धितोपत्र बजारमा पार्न सक्ने प्रभावबारे पनि चासो व्यक्त गरिएको छ।