नेपाली राजनीतिमा पछिल्लो समय एउटा ठूलो हलचल पैदा गर्ने गरी नयाँ शक्तिहरूबीच एकताको ढोका खुलेको छ। उज्यालो नेपाल पार्टीका संरक्षक तथा नेपाल विद्युत् प्राधिकरणका पूर्व कार्यकारी निर्देशक कुलमान घिसिङ र राष्ट्रिय स्वतन्त्र पार्टी (रास्वपा) बीच पार्टी एकता र सहकार्यको अन्तिम सहमति जुटेको छ। यस सहमतिसँगै घिसिङ रास्वपाको उपसभापति बन्ने पक्का भएको छ।

लामो समयदेखि पर्दाभित्र चलिरहेको वार्तापछि सोमबार काठमाडौँमा भएको विशेष छलफलमा रास्वपा सभापति रवि लामिछाने र कुलमान घिसिङबीच सहमतिको खाका (ड्राफ्ट) मा हस्ताक्षर हुने चरणमा पुगेको हो। घिसिङको सचिवालयले दिएको जानकारी अनुसार उनी रास्वपामा उपसभापति पदसहित पार्टीको दोस्रो वरीयतामा रहनेछन्।

बालेन, रवि र कुलमानको त्रिपक्षीय गठबन्धन यो सहमति केवल दुई पक्षबीच मात्र सीमित छैन। यसअघि नै काठमाडौँ महानगरपालिकाका मेयर बालेन शाहलाई आगामी निर्वाचनमा प्रधानमन्त्रीको उम्मेदवारका रूपमा अघि सार्ने र रवि लामिछाने पार्टी सभापतिमै रहने समझदारी भइसकेको थियो। बालेनको उम्मेदवारीलाई लिएर सुरुवाती चरणमा केही असन्तुष्टि व्यक्त गरेका घिसिङसँग पटक-पटकको छलफलपछि उनी पनि यो वृहत्तर मोर्चामा सामेल हुन तयार भएका हुन्। सोमबार नै रवि, बालेन र कुलमानबीच आगामी निर्वाचनमा एकसाथ होमिने ऐतिहासिक सहमति भएको छ।

शक्ति बाँडफाँड र चुनावी रणनीति सहमति अनुसार कुलमान घिसिङको टिमबाट १८ जनालाई समानुपातिक उम्मेदवारको सूचीमा समावेश गरिनेछ। यो संख्या रास्वपाको कुल समानुपातिक हिस्साको १६ प्रतिशतभन्दा बढी हुन आउँछ। आफ्नो समूहको उचित प्रतिनिधित्व सुनिश्चित भएपछि घिसिङले वैकल्पिक राजनीतिको यो ठूलो मोर्चामा समाहित हुने निर्णय लिएका हुन्।

यस नयाँ राजनीतिक ध्रुवीकरणले स्थापित पुराना राजनीतिक दलहरूलाई ठूलो दबाब दिने निश्चित छ। रवि लामिछानेको सांगठनिक सञ्जाल, बालेन शाहको लोकप्रियता र कुलमान घिसिङको कार्यसम्पादन छविलाई एउटै मञ्चमा ल्याएर आगामी निर्वाचनमा वर्चस्व कायम गर्ने रणनीति यी तीनै पक्षले लिएका छन्।

यो एकतासँगै अब रास्वपाले नयाँ उर्जाका साथ आफ्नो चुनावी अभियानलाई देशव्यापी बनाउने तयारी थालेको छ। सहमति पत्रमा हस्ताक्षर भएसँगै यसको औपचारिक घोषणा गर्ने तयारी भइरहेको स्रोतले जनाएको छ।