सरकारले प्राकृतिक व्यक्तिको मृत्युपछि हुने स्वामित्व परिवर्तनमा आयकर ऐनको दफा ५७ लागू नहुने व्यवस्था गर्ने घोषणा गरेको छ।

आगामी आर्थिक वर्ष २०८३/८४ को बजेट प्रस्तुत गर्दै अर्थमन्त्री डा. स्वर्णिम वाग्लेले प्राकृतिक व्यक्तिको मृत्युपश्चात् हुने अस्वेच्छिक निःसर्ग तथा निकायमा भएको स्वामित्व परिवर्तनका कारण नियन्त्रित निकायमा देखिने स्वामित्व परिवर्तनमा आयकर ऐनको दफा ५७ आकर्षित नहुने बताएका हुन्।

यस व्यवस्थाले मृत्युका कारण परिवार वा उत्तराधिकारीमा स्वामित्व हस्तान्तरण हुँदा करसम्बन्धी अन्योल कम गर्ने अपेक्षा गरिएको छ। विशेषगरी कम्पनी, व्यवसाय वा लगानीमा प्राकृतिक व्यक्तिको स्वामित्व रहेको अवस्थामा मृत्युका कारण हुने स्वामित्व परिवर्तनलाई साधारण व्यापारिक स्वामित्व परिवर्तनकै रूपमा व्याख्या गरिँदा देखिन सक्ने कर जटिलता कम हुने देखिएको छ।

यसअघि स्वामित्व परिवर्तनसम्बन्धी कर व्यवस्थाले व्यवसायी, लगानीकर्ता तथा उत्तराधिकारीहरूमा अन्योल सिर्जना गर्ने गरेको थियो। नयाँ व्यवस्थापछि मृत्युका कारण हुने स्वामित्व हस्तान्तरणलाई कर प्रणालीले फरक ढंगले हेर्ने संकेत बजेटले दिएको छ।

सरकारले बजेटमार्फत कर प्रणालीलाई सरल बनाउने, व्यवसायिक वातावरण सहज बनाउने र अनावश्यक कर विवाद घटाउने नीति लिएको छ। सोही क्रममा प्राकृतिक व्यक्तिको मृत्युपछि हुने स्वामित्व परिवर्तनमा दफा ५७ नलाग्ने व्यवस्था अघि सारिएको हो।