सामाजिक विकास कार्यालयले आर्थिक वर्ष २०८३/८४ को स्वीकृत वार्षिक कार्यक्रमअनुसार केश श्रृङ्गार तथा सौन्दर्य, सिलाइ कटाइ, प्लम्बिङ र विद्युत् जडानसम्बन्धी आधारभूत तालिमका लागि आवेदन माग गरेको छ।

कार्यालयले केश श्रृङ्गार तथा सौन्दर्य बेसिक, सिलाइ कटाइ बेसिक, प्लम्बिङ बेसिक र विद्युत् जडान बेसिक गरी चार विषयमा तीनमहिने सीपमूलक तालिम सञ्चालन गर्न लागेको हो। प्रत्येक तालिमको अवधि तीन महिना अर्थात् ३९० कार्यघण्टा हुनेछ। कार्यालयका अनुसार दैनिक औसत चारदेखि छ घण्टासम्म तालिम सञ्चालन गरिनेछ।

तालिमका लागि आवेदन दिने उम्मेदवारले कम्तीमा कक्षा ८ उत्तीर्ण गरेको हुनुपर्छ। आवेदन दिने व्यक्तिको उमेर १६ वर्ष पूरा भई ४० वर्ष ननाघेको हुनुपर्ने सूचनामा उल्लेख छ। सहभागी छनोट गर्दा गरिब, विपन्न, दलित, महिला, पिछडिएको वर्ग वा समुदाय, अपाङ्गता भएका व्यक्ति, जनआन्दोलनमा घाइते, शहीद परिवार तथा एकल महिलालाई प्राथमिकता दिइनेछ।

इच्छुक उम्मेदवारले तोकिएको दरखास्त फाराम भरेर २०८३ भदौ ३ गते कार्यालय समयभित्र आवेदन दिनुपर्नेछ। आवेदन फाराम सामाजिक विकास कार्यालय, धुलिखेलमा उपस्थित भएर लिन सकिनेछ। त्यस्तै, कार्यालयको आधिकारिक वेबसाइट www.sdokavre.bagamati.gov.np बाट डाउनलोड गर्न वा सम्बन्धित तालिम सञ्चालन हुने नगरपालिका वा वडा कार्यालयबाट प्राप्त गर्न सकिनेछ। तालिमका लागि आवेदन शुल्क लाग्दैन।

आवेदन फारामसँग नेपाली नागरिकताको प्रमाणपत्रको प्रतिलिपि एक प्रति, शैक्षिक योग्यताको प्रमाणपत्रको प्रतिलिपि एक प्रति र हालसालै खिचिएको पासपोर्ट साइजको फोटो चार प्रति बुझाउनुपर्नेछ। तालिममा सहभागी हुने उम्मेदवारको छनोट अन्तर्वार्तामार्फत गरिनेछ। अन्तर्वार्तामा जाँदा उम्मेदवारले आवेदनमा पेश गरेका कागजातका सक्कल प्रमाणपत्रसमेत साथमा लैजानुपर्नेछ।

तालिमअनुसार अन्तर्वार्ताको मिति र स्थान फरक तोकिएको छ। केश श्रृङ्गार तथा सौन्दर्य बेसिक तालिमका लागि २०८३ भदौ ५ गते बिहान १० बजेदेखि सामाजिक विकास कार्यालय, धुलिखेलमा अन्तर्वार्ता हुनेछ। सिलाइ कटाइ बेसिकका लागि २०८३ भदौ ४ गते बिहान १० बजेदेखि सामाजिक विकास कार्यालय, धुलिखेलमा अन्तर्वार्ता लिइनेछ। प्लम्बिङ बेसिकका लागि २०८३ भदौ ५ गते बिहान ११ बजेदेखि बनेपा नगरपालिका वडा नं. २ मा र विद्युत् जडान बेसिकका लागि सोही दिन बिहान ११ बजेदेखि धुलिखेल नगरपालिका, धुलिखेलमा अन्तर्वार्ता हुनेछ। छनोट भएका उम्मेदवारलाई तालिम सुरु हुने मिति नतिजा प्रकाशनकै दिन जानकारी गराइने सूचनामा उल्लेख छ।

तालिमबारे थप जानकारीका लागि विषयअनुसार सम्पर्क नम्बरसमेत उपलब्ध गराइएको छ। केश श्रृङ्गार तथा सौन्दर्य तालिमका लागि अनुपा घिमिरेलाई 9845077366 मा, सिलाइ कटाइका लागि सम्बन्धित प्रशिक्षक वा सामाजिक विकास कार्यालयलाई 9864848369 मा, प्लम्बिङका लागि प्रशिक्षक नवराज पौडेललाई 9845147440 मा र विद्युत् जडानका लागि प्रशिक्षक शम्भु आचार्यलाई 9841008997 मा सम्पर्क गर्न सकिने सूचनामा उल्लेख छ। आवेदन फाराम तथा थप आधिकारिक जानकारीका लागि सामाजिक विकास कार्यालय, धुलिखेल, काभ्रेपलाञ्चोक वा कार्यालयको वेबसाइटमा समेत सम्पर्क गर्न सकिन्छ।