चालु आर्थिक वर्ष २०८२/८३ को वैशाख मसान्तसम्म नेपालको विदेशी विनिमय सञ्चिति उल्लेख्य रूपमा बढेको छ ।

नेपाल राष्ट्र बैंकले सार्वजनिक गरेको देशको वर्तमान आर्थिक तथा वित्तीय स्थिति सम्बन्धी प्रतिवेदनअनुसार कुल विदेशी विनिमय सञ्चिति ३८.३ प्रतिशतले वृद्धि भई ३७ खर्ब ४ अर्ब ५५ करोड रुपैयाँ पुगेको छ ।

आर्थिक वर्ष २०८२/८३ सुरु हुँदा अर्थात् २०८२ असार मसान्तमा कुल विदेशी विनिमय सञ्चिति २६ खर्ब ७७ अर्ब ६८ करोड रुपैयाँ रहेको थियो । अमेरिकी डलरमा गणना गर्दा उक्त सञ्चिति १९ अर्ब ५० करोड डलरबाट २४ प्रतिशतले बढेर २४ अर्ब १९ करोड डलर पुगेको छ ।प्रतिवेदनअनुसार नेपाल राष्ट्र बैंकसँग रहेको विदेशी विनिमय सञ्चिति पनि उल्लेख्य रूपमा बढेको छ । २०८२ असार मसान्तमा २४ खर्ब १४ अर्ब ६४ करोड रुपैयाँ रहेको यस्तो सञ्चिति ३६.६ प्रतिशतले वृद्धि भई २०८३ वैशाख मसान्तमा ३२ खर्ब ९८ अर्ब ३८ करोड रुपैयाँ पुगेको छ ।

त्यसैगरी, नेपाल राष्ट्र बैंकबाहेक बैंक तथा वित्तीय संस्थासँग रहेको विदेशी विनिमय सञ्चिति २ खर्ब ६३ अर्ब ४ करोड रुपैयाँबाट ५४.४ प्रतिशतले वृद्धि भई ४ खर्ब ६ अर्ब १७ करोड रुपैयाँ पुगेको छ । २०८३ वैशाख मसान्तसम्मको कुल विदेशी विनिमय सञ्चितिमध्ये भारतीय मुद्राको हिस्सा २०.६ प्रतिशत रहेको नेपाल राष्ट्र बैंकले जनाएको छ ।

विदेशी विनिमय सञ्चितिको पर्याप्तता सूचक पनि सन्तोषजनक देखिएको छ । आर्थिक वर्ष २०८२/८३ को पहिलो दश महिनाको आयातलाई आधार मान्दा बैंकिङ क्षेत्रसँग रहेको विदेशी विनिमय सञ्चिति २२.६ महिनासम्मको वस्तु आयात तथा १९.२ महिनासम्मको वस्तु र सेवा आयात धान्न पर्याप्त रहने देखिएको छ ।

प्रतिवेदनअनुसार २०८३ वैशाख मसान्तमा विदेशी विनिमय सञ्चितिको कुल गार्हस्थ्य उत्पादनसँगको अनुपात ६०.७ प्रतिशत रहेको छ । त्यस्तै कुल आयातसँगको अनुपात १५९.७ प्रतिशत तथा विस्तृत मुद्राप्रदायसँगको अनुपात ४३.३ प्रतिशत पुगेको छ ।

अघिल्लो आर्थिक वर्षको अन्त्य अर्थात् २०८२ असार मसान्तमा यी अनुपात क्रमशः ४३.८ प्रतिशत, १२८.१ प्रतिशत र ३४.१ प्रतिशत रहेका थिए। विदेशी विनिमय सञ्चितिसँग सम्बन्धित सबै प्रमुख सूचकहरूमा सुधार देखिएकाले नेपालको बाह्य क्षेत्र थप सुदृढ बन्दै गएको संकेत प्रतिवेदनले गरेको छ ।